MMO Quotes, often spoken by influential individuals or derived from literature, can spark motivation and encourage people to take action. Whether it's facing challenges or overcoming obstacles, reading or hearing a powerful MMO quote can lift spirits and rekindle determination. MMO Quotes distill complex ideas or experiences into short, memorable phrases. They carry timeless wisdom that often helps people navigate life situations, offering clarity and insight in just a few words.
મારો વહાલો દીકરો અકી (અર્ક)
તારી બોર્ડની પહેલી પરિક્ષાનું પહેલું પેપર આવતી કાલે છે. કેટલા લોકો એ શુભેચ્છાઓ પાઠવી કેટલા લોકો એ સાકરપડો આપ્યો. એ બધાના આશીર્વાદ હમેંશા કામ આવે જ દીકરા તે યાદ રાખજે. સમજુ છું કે અત્યારે પરિસ્થતિ એવી છે કે આ નાનકડી પરિક્ષાનો હાઉ પણ એવો બનાવી દેવામાં આવ્યો છે કે જાણે રાક્ષસ હોય. આ તો પહેલું પગથિયું છે તારી કારકિર્દીનું હજી તો આખો ગિરનાર ચડીને દત્તાત્રેયની ટોચ સુધી જવાનું છે તારે માટે જરાય ચિંતા ન કરતો આ પરિક્ષા તો રિક્શા જેવી હોય આવે અને જાય. આપણને એક જગ્યા એથી બીજી જગ્યા એ પહોંચવામાં મદદ કરે માટે જેમ પહેલી રિક્ષા જેવું જ આમાં પણ હોય પરિક્ષા તો આવે જાય બહુ ચિંતા કરવી નહીં. આપણે હમેંશા આપણું ૧૦૦ ટકા આપવું જે આખું વર્ષ શીખ્યા છીએ તે ત્રણ કલાકમાં તો થોડી સાબિતી આપી શકાય પણ આ પરિક્ષાને એક પરિણામ લક્ષી ન જોવી બેટા પરિક્ષામાં ભાગ લેવા થી જ અડધી જંગ તો જીતી લેવાય છે. બધા ભલેને બિવડાવે.. તને ખબર છે.. ગયા વર્ષે ૧૭ લાખ થી ઉપર બાળકો એ આ પરિક્ષા આપેલ એમ દર વર્ષે લાખો લોકો આ પરિક્ષા આપે છે જેમાં થોડાક જ બાળકો ખૂબ સારા માર્ક્સ સાથે પાસ થતાં હશે અને એ પણ આ પરિક્ષામાં પણ જીવનની પરિક્ષામાં તો કદાચ જે ધાર્યા કરતાં પરિણામ નહીં લાવ્યા હોય તે જ પાસ થયા હશે.
પરિક્ષા એ કોઈ તમારું પોતાની બુધિક્ષમતા માપવા નથી લેવાતી એ તો શિક્ષણ પદ્ધતિના ભાગરૂપે જ લેવાય છે. એટલે આપણે આપણું કામ કરવાનું જે પેપરમાં પૂછાય તે દરેક સવાલના જવાબ આપણી સમજશક્તિ મુજબ આપી દેવાના બહુ ચિંતા કરવાની નહીં. કારણ આ પરિક્ષામાં જે ટોપ કરે તે કદાચ જિંદગીમાં આવતી કેટલીય પરિક્ષામાં પાસ પણ ન થઈ શકે અને આ પરિક્ષામાં જે નબળું પુરવાર થાય તે જીવનની પરિક્ષાનો એકકો પણ સાબિત થાય.
બસ કોઈ જ ચિંતા કર્યા વગર મસ્ત રીતે પેપર લખીને આવજે પરિણામ અમારા માટે ક્યારેય મહત્વનું રહ્યું નથી અને રહેશે નહીં ...
તારી હિટલર મમ્મી
માતંગી માંકડ ઓઝા
આ સાથે બોર્ડની પરિક્ષામાં બેસનાર બાળકોના વાલી અને અભિભાવકોને હાથ જોડી વિનંતી કરીશ કે બાળકોને પરિક્ષાની બીક ન લાગવા દયો એમનાં માટે બોર્ડની પરિક્ષા પણ એટલી જ સામાન્ય બનાવો જેટલી બીજી સ્કુલની પરિક્ષા ઓ હતી. આપણા બાળકો એ હજી તો જિંદગીમાં આગળ ખૂબ બધી પરિક્ષાનો સામનો કરવાનો છે માત્ર એકેડેમીક જ નહીં ડગલેને પગલે લોકો અને કુદરત પણ પરિક્ષા લેશે એટલે આ પહેલાં પગલાં માં જ એમને એટલા સક્ષમ બનાવી દયો કે પરિક્ષાને હાવી નહીં હવા ગણી શકે. એમને પાસ થવાનું છે નાસીપાસ નહીં. આ કોઈ જ મોટી પરિક્ષા નથી તે તમારે પણ યાદ રાખવાનું છે.(#MMO )
#માઇક્રોફિક્સન
#આઝાદી_એટલે_શું ???
આ આજે શું છે સાહેબ? સિગ્નલ પર ભીખ માંગતી ગૌરી એ ટ્રાફિક પોલીસ ને પૂછ્યું.
ગૌરી આજે ભારત સંપૂર્ણ લોકતંત્ર બન્યું હતું. ટ્રાફિક હવાલદારે કહ્યું. (#MMO )
એટલે સાહેબ ગૌરી ની ઉત્સુકતા વધતી જતી હતી. આપણને આઝાદી મળી , આટલું હવાલદાર બોલ્યા ત્યાં જ ગૌરી એ વચ્ચે જ કહ્યું આ આઝાદી એટલે શું??????? {#માતંગી }
#સ્વાગતમ_૨૦૨૦
નવું કેલેન્ડર વર્ષ શરૂ થયું , આમ તો હિન્દુ નું વર્ષ અલગ શરૂ થાય પણ મોટે ભાગે આપણે કેલેન્ડર વર્ષનો જ ઉપયોગ કરતાં હોઈએ એટલે આ વર્ષ નું મહત્વ રહેવું જ જોઈએ. જન્મદિવસ થી લઇ દરેક મહત્વની વસ્તુ માટે આપણે તારીખ ને તો મહત્વ આપીએ છીએ કેટલાં લોકો તો એવા હશે જેમને પોતાના જન્મની તિથિ યાદ પણ નહીં હોય.
આજથી શરૂ થતું ૨૦૨૦ નું વર્ષ ૨૦ ૨૦ ના મેચ જેવું જ એકસાઇટમેંટ વાળું રહે એવી સૌ ને શુભેચ્છા સાથે મારા દરેક અભિભાવકો નો હાથ જોડી ને ધન્યવાદ પણ કહીશ કે ૨૦૧૯માં મને ખૂબ જ સારી રીતે સમજી શક્યા છો. મારી દરેક વાતો ને તમે વધાવી છે તો ૨૦૨૦માં પણ આ વસ્તુ ચાલુ જ રાખશો.
બે ચાર મારા વિચાર અહીં શેર કરવા માંગુ છું. આમ તો ૧લી જાન્યુઆરીથી ઘણાં રીસોલ્યુશન લેવામાં આવતાં હોય છે જે પાંચ જાન્યુઆરી સુધી ચાલતાં હોય છે એટલે એવાં અઘરાં રીસોલ્યુશન ની વાત નથી કરવી જે ચાઇના ના માલ જેવા હોય કે ચલે તો ચાંદ તક...
ઘણાં લોકો કહેશે કે રાત ગઈ બાત ગઈ ૨૦૧૯ માં થયેલ કડવા અનુભવો ભૂલી જવા. ભૂલો ને ભૂલી જવી . એવી યાદો જે તકલીફ આપે એના થી દુર રહેવું તો મારું કહેવાનું સાવ અલગ જ છે. ૨૦૧૯ ને વાગોળવો સારી યાદો ને યાદ કરી ને એક એવા પટારા માં મૂકવી જ્યાં થી ગમે ત્યારે ખોલી ને મમળાવી શકાય. કડવા અનુભવો ને ફરી અત થી ઇતિ યાદ કરવાં અને એવા પટારામાં મૂકી તાળું દઈ ને તે પટારો જ સમુદ્ર માં ફેંકી દેવો જેથી તે અનુભવ અને તેની સાથે જોડાયેલ લોકો થી દુર રહેવું. રહી વાત ભૂલો ની તો માણસ છે ભૂલ કરે એટલે એ એવાં પટારામાં મૂકી તાળું દેવું કે જરૂર પડે તે ચાવી થી ખોલીને ભૂલ સુધારી શકાય. ટુંકમાં ૨૦૨૦માં એ ભૂલોનું પુનરાવર્તન ન થાય તે જોવાની જવાબદારી તમારી ખુદની જ રહેશે.
કોઈ પણ નવો સમય તમને બદલાવ લાવવા માટે પ્રેરણા આપતો હોય છે. જો સમાજમાં બદલાવ જોતો હશે તો પોતાની જાતને બદલવી જ પડશે. ૯૨.૭ નું ગીત છે કે "तू बदले तो ही बदले जमाना औरो से पहले खुदको ये समझाना" જો એવી ઈચ્છા હોય કે આપણી આસપાસ ની વ્યક્તિ બદલાય જાય તો પહેલાં જાતે જ બદલવું પડશે. ૨૦૨૦ માં સાવ નાના નાના બદલાવ તમને એક અલગ જ સ્થાન આપી શકશે.
*તમારા માટે આખા દિવસ માં માત્ર ૩૦ મિનિટ ફાળવો
*જો કોઈ શોખ હોય તો તે શોખને કેળવવાનો પ્રયત્ન કરો.
*નકારાત્મક વિચારો અને લોકો થી દુર રહો.
*તમારા વિશે ખરાબ બોલનાર વિશે હમેંશા સારી વાતો વિચારો
*તમે છો તેવા જ સ્વીકારો અને લોકો જેવા છે તેવા જ ચાહો.
* કોઈ વ્યક્તિ ને અવગણવાની નહીં તેનાં કરતાં તેને મળવાનું ટાળવું.
*જ્યાં તમારું માન નથી ત્યાં તમારું સ્થાન નથી તે યાદ રાખવું.
* તમને ન ગમતા અને તમને ન ગમાડતા બને પ્રકારના વ્યક્તિઓ થી દુર રહેવુ.
* જે વ્યક્તિ સાથે રહેવાથી તમારામાં વિશ્વાસ વધે એમની સાથે રહેવું.
*જે વ્યક્તિ ખોટું બોલે કે તમને ખોટા પાળે તે બંને થી દુર રહેવું. (#MMO )
ટુંકમાં ૨૦૨૦માં થોડું સ્વાર્થી બનવામાં જરાય વાંધો નથી. કારણ જો જાત વિશે નહીં વિચારો તો કોઈ પણ માટે નહીં જ સારું કરી શકો.
{#matangi }
#ગૃહિણી_ખર્ચાઈ_જાય
આજે એક ફોટો જોયો જે ગમી ગયો કારણ અત્યારે હું પણ એ ફોટોની જેમ એક ફૂલ ટાઈમ ગૃહિણી જ છું. મેં દરેક પ્રકારનું જીવન જીવી લીધું છે પાર્ટ ટાઈમ નોકરી કે વર્ક ફ્રોમ હોમ કે ટુરિંગ હોય એવી જોબ કે ૧૦ થી ૬ની જોબ, સરકારી, અર્ધ સરકારી, શાળા , કંપની , ખાનગી કંપની , એનજીઓ દરેક પ્રકારનો અનુભવ મેં લઈ લીધો છે. અત્યારે આ અનુભવ પણ લઈ જ રહી છું. વાત છે એક ગૃહિણી આમ તો ઘણી વખત લખેલું છે અને આગળ પણ આ વિષય પર ઘણું જ લખીશ પણ ખરી કે ગૃહ જેનું ઋણી તે ગૃહિણી સવારે એલાર્મ બને ત્યારથી લઈ ને રાત્રે સુવા માટે લાઈટ બંધ કરવા સુધી જે કામ કરે છે તેનું લીસ્ટ બનાવવા માં આવે તો કેવડું મોટું બને (આ વાત કરું છું એટલે પુરુષો નકામા કે એમનું મહત્વ ઓછું કહેવાનો ઈરાદો નથી જો એ સમજો તો તમારી સમજશક્તિ ને આભારી)
ખાલી રૂપિયા કમાઈ લાવવા થી ઘર ચાલતું નથી માત્ર નોકરી જ કરવાથી ઘરની બહાર રહી ને કમાણી કરવાથી ઘર ઘર નથી બનતું એ ઘર ને ઘર બનાવવા એક ગૃહિણી પોતાની જાતને ઘસી નાખે છે. હા કદાચ મૂડીના રૂપે એ ગૃહિણી ઘરમાં કંઈ નહીં લાવતી હોય પણ સંસ્કાર, સ્વચ્છતા, સુખ શાંતિ બધું જ તો આ જ લાવે છે. જો રૂપિયા થી સુખ શાંતિ કે ઘર બનતા હોત તો રૂપિયા વાળા સુખીને બાકીના દુઃખી હોત. સ્ત્રી જે દરેક પળે પોતાની જાતને ખર્ચે છે તે ખર્ચનો હિસાબ જ કરવામાં આવતો નથી. કારણ એ તો એની ફરજમાં આવે છે.
મેં હમેંશા જોયું છે મારી આસપાસ પણ કે ૨૪ કલાક ૩૬૫ દિવસ પોતાના ઘર અને કુટુંબ માટે સમર્પિત આ સ્ત્રીને માત્ર મહિનામાં જો બે કલાક પણ પોતાના માટે પોતાને ગમતું કરવા મળે તો તે રાજી થઈ જાય છે. પોતાની જાતને ખર્ચીને ખાલી કરી નાખતી આ ગૃહિણી ને રૂપિયામાં તોલી શકાય ખરી? શું એ કાગળની નોટ શારીરિક ઘસાતી વ્યક્તિ સામે એવી ક્ષમતા ધરાવે છે.(#MMO )
ઘણી વખત નોકરી કરતી સ્ત્રીઓ ને અભિમાન (માફ કરજો પણ હકીકત એ જ છે) હોય છે કે તે બંને કરી શકે છે તો એક અનુભવ પરથી એટલું જ કહીશ કે નોકરી ના જે તે કલાક તમે તમારા માટે જીવી રહ્યા છો તે આં ગૃહિણી ના ભાગમાં નથી. તમે નોકરી ના બહાને કોઈ કામ કે સોશ્યલી પણ છટકબારી મેળવી શકશો પણ આ ગૃહિણી એ નહીં જ કરી શકે. હું તો બને વસ્તુ કરી ચૂકી છું એટલે અનુભવે કહીશ કે નોકરી કરી ઘર સંભાળવું વધુ સહેલું છે. જ્યારે માત્ર ઘર સંભાળવું એ એટલે અઘરું છે જેમાં પોતાની જાતને સંભાળવા સમય મળતો નથી. માટે તમારા ઘરની ગૃહિણી ને એટલું સન્માન આપજો કારણ તમે તો માત્ર રૂપિયા ખર્ચી જાણો છો તે તમારા માટે પોતાની જાતને ખર્ચી રહી છે.(#માતંગી )
#Stop_Body_Shaming
નળાકાર, પીપ , સુકલકડી, સાથીકડું કે કુપોષણ નો શિકાર. સ્ત્રીઓ માટે બાહ્ય સુંદરતા નું મહત્વ વધુ હોય છે અને ઍટલે જ સ્ત્રીઓ ના દેખાવમાં 19 20 થાય તો લોકો તરત ચર્ચા કરે છે. અરે જો તો કપડાં નો કલર કેવો પસંદ કર્યો કાળી છે એ અરીસા માં નહીં દેખાતું હોય. અરે આટલી જાડી છે તો પણ ફેશન ના ફતુરા ગયા નહીં. જેવી ઘણી વાતો સાંભળી હશે અને ક્યારેક બોલી પણ હશે. શા માટે કોઈ ના શારીરિક દેખાવ પર આવી કૉમેન્ટ કરવાની શું ક્યારેય પુરુષો વચ્ચે આવી વાતો થતી જોઈ? શું પુરુષો શારીરિક રીતે પરફેક્ટ જ હોય છે. શું એમાં પણ કોઈ ની ફાંદ લાફિંગ બુદ્ધા જેવી હોય. કોઈ ના વાળ ન હોય. કોઈ વધુ પડતું દેખાવે વરવું હોય. પુરુષ કાળો તો તે કાનુડો પણ સ્ત્રી કાળી પણ કામણગારી હોઈ જ શકે. પુરુષ જાડો તો સુખી જીવડો સ્ત્રી જાડી તો કેટકેટલા શબ્દો.. ના સમજી શકું છું કે સૌંદર્ય અને સ્ત્રી એક બીજાના પૂરક છે પરંતુ સુંદરતા માત્ર શારીરિક હોવાથી એ સુંદરતા નો કોઈ અર્થ રહેતો નથી. બાહ્ય સુંદરતા કરતાં આંતરિક સુંદરતા વધુ નિખાર લાવે છે.
સ્ત્રીઓ ને હમેંશા પોતાના શારીરિક દેખાવ પ્રત્યે અણગમો જ રહે. બહુ ઓછી એવી સ્ત્રીઓ હોય જે પોતે જેવી છે દેખાવે તેના થી ખુશ હોય. તૈયાર થઈ અરીસામાં જોઈ ક્યારેય પોતાને વાહ સરસ નહીં જ કહ્યું હોય. તમારે આ બોડી શેમિંગ ને શરમાવવું હશે તો પહેલાં પોતાના શારીરિક દેખાવને સ્વીકારવો પડશે. માત્ર ધોળા દેખાવું મહત્વનું નથી જ્યારે તમારું મન કાળું હોય. તમે ગમે તેટલાં સુંદર હો જો મેકઅપ અને સૌન્દર્ય પ્રસાધન થી તમારા દેખાવને છુપાવવો પડે તો સૌથી વધુ તમે જ તમારી જાતને છેતરી રહ્યા છો. એટલે હું એ પ્રસાધનો ના વપરાશ ના ખિલાફ નથી. પરંતુ પ્રસંગોપાત જો તમે વાપરો તો કોઈ ખોટું પણ નથી. (#MMO )
બોડી પોઝિટિવ બનવાનો પ્રયાસ કરો. તમારી સ્વસ્થતા ને પ્રાધાન્ય આપો સુંદર આપો આપ બની જશો. આ વાત અહીં કરવાનું કારણ જ તે કે રૂપ અને શારીરિક સૌંદર્ય આજે છે કાલે નથી તેને કોઈ ની શરમનું કારણ ન બનાવો. આપણે સ્ત્રી સશક્તિકરણ, સમાનતા જેવાં બ્યુગલ તો વગાડીએ છીએ પરંતુ પુરુષો જેવી પારદર્શિતા, પુરુષો જેવું વર્તન નથી કરી શકતાં. શારીરિક સુંદરતા હોવી સારી વાત છે પરંતુ આપણા સમાજમાં જે સ્ત્રી ને સુંદરતા અને પુરુષને બુદ્ધિમતા થી જોવામાં આવે છે તેમાં હજી બદલાવ જરૂરી છે. આ બદલાવ આપણે પોતે જ લાવવો પડશે. આપણી જાતને બોડી શેમીંગ થી દુર રાખીને. સ્વસ્થ રહેવું સુંદર રહેવા કરતાં જરૂરી છે અને આ માનસિકતા અને શારીરિક બંને ને લાગુ પડે છે. આત્મવિશ્વાસ કેળવો જેવા છો તેનો સ્વીકાર ખુદ કરો. આપ મર્યા વગર સ્વર્ગે ન જવાય તેમ જ પોતાના સ્વીકાર વગર બીજા આગળ આશા ન રખાય. એ યાદ રાખજો કે જવાની તો જવા ની જ છે ...
https://youtu.be/cL74gQT_MMs
#નિઃસહાય_રૂદન
શું લખું શબ્દો નથી, આમ તો આપણા દેશમાં બળાત્કાર થયા જ રાખે છે. પણ અમુક સમયે દેશવાસીઓ જાગે છે અને પાછા સૂઈ પણ જાય છે. કાયદો કડક કરવાથી આ પરિસ્થતિ ઓછી થઈ શકશે સમજી શકાય પણ જડમૂળથી ફેરફાર કરવો પડશે. બળાત્કારનો ભોગ બનનાર કેવી યાતનામાં હશે તે એક સ્ત્રી તરીકે હું સમજી શકું છું. અત્યારે મારી અંદર એવો જુવાળ છે કે કદાચ એક બળાત્કારી પણ સામે આવે તો એનું ખૂન કરતાં મારા હાથ જરાય ધ્રૂજે નહીં.
આપણા ન્યાયતંત્રમાં જોગવાઈ કરો કે બળાત્કાર જેવા ગુનામાં રાતો રાત નિર્ણય લાવવો જોઈએ અને તેની સજાનું લાઈવ ટેલિકાસ્ટ થવું જોઈએ. તેને માત્ર ફાંસી આપીને નહીં તેને રિબાઈ રિબાઈને મારવા જોઈએ. ક્યાં સુધી સહિષ્ણુતાના લેબલ નીચે આપણી બહેન દીકરી સાથે અન્યાય થતો જોઈશું. તાત્કાલિક તો કડક કાયદા સાથે કડક અમલવારી પણ જરૂરી જ છે. કાયદા તો બને છે પણ સાથે જે છટકબારી હોય છે તે પણ તરત અમલમાં આવે છે.
પહેલાં જે જડમુળની વાત કરી તો શા માટે બળાત્કાર થાય છે એ જાણવું જરૂરી છે , હજી આપણા સમાજમાં સ્ત્રીને જે દ્રષ્ટિથી જોવામાં આવે છે હજી જે પિતૃસત્તાક સમાજની અસર છે તે દૂર કરવી પડશે. તમારા ઘરમાં જન્મેલ પુરુષને સ્ત્રીનું સન્માન કરતા શીખવાડવું પડશે. સ્ત્રી એ ઉપભોગનું સાધન નથી તે ખાસ એમને શીખવાડવું પડશે. સ્ત્રીઓને કઠોર અને પુરુષોને લાગણીશીલ કરવા પડશે.
કોઈ સ્ત્રીની મરજી વિરુદ્ધ (પછી એ પત્નિ જ કેમ ન હોય) તમે એનાં શરીરને અડી શકો નહીં તે શીખવાડવું પડશે. સ્ત્રી એ જાગીર નથી એ સમજાવવું પડશે. સામે દરેક સ્ત્રીને એટલી સશકત કરવી પડશે કે કોઈ પણ વ્યક્તિ તેની મરજી વિરુદ્ધ નજર પણ ન નાખી શકે અડવાની વાત તો દૂર રહી. બહુ લાંબા ગાળાની પ્રોસેસ છે પણ કરવી જ પડશે.
બીજું સેક્સ ને સુગ નહીં જીવનનો ભાગ ગણવો પડશે. સેક્સ એજ્યુકેશનને સહજતાથી માત્ર શાળા પૂરતું નહીં સમાજમાં પણ સ્વીકાર્ય કરવું પડશે. તમારા જુવાન થઈ રહેલ દીકરા કે દીકરીને સેક્સ વિશેની સમજ આપવી પડશે. એ કોઈ છુપાવવાની વસ્તુ નથી એ કોઈ શરમની વસ્તુ નથી તે શીખવાડવું પડશે. તેને સામાન્ય બનાવવું પડશે.(#MMO )
હવે મને મારા દેશની આ દશાની ન તો દયા આવે છે ન તો ગુસ્સો આવે છે કારણ હવે આવી ઘટના સામાન્ય બનતી જાય છે. હું નિઃસહાય ફીલ કરું છું મારી જેમ જ આજની દરેક નારી શક્તિ નહીં નબળી બની રહી છે આવું સાંભળીને કંઇક તો એવો રસ્તો કરો કે જ્યાં અમને કાંટા નહીં પુષ્પો મળે અને અમારે એમ ન કહેવું પડે કે "અગલે જનમ મોહે બિટિયા ન કીજો" {#માતંગી }
ઓમ શાંતિ...
#શોખ
શોખ શબ્દ બે જ અક્ષરનો છે પણ તેની અસર ખૂબ વ્યાપક છે. જો કોઈ શોખ તમારા જીવનમાં હોય તો જિંદગી સુંદર બની જાય છે. શોખ માટે સમય ની ક્યારેય અછત સર્જાતી નથી. હા પણ જો શોખ માત્ર લોકો ને કહેવા માટે હોય તો પછી તે શોખ માટે સમય ની અછત હમેંશા રહેશે. જરૂર છે તમારા શોખ ને ઓળખવાની અને તેની માટે એક ડગલું ભરવાની પછી જોવો લાલ જાજમ પાથરેલ રસ્તો તૈયાર જ હશે તમારા માટે , કહેવાય છે ને કે "જહાં ચાહ વહાં રાહ". એટલે જો ઈચ્છા હશે તો ચોક્કસ રસ્તો નીકળશે. બધા પાસે ચોવીસ કલાક જ હોય છે , પણ હમેંશા તમારે તમારા જીવનમાં પ્રાયોરિટી નક્કી કરવી પડશે. તમારા શોખ માટે માત્ર થોડો સમય ફાળવશો તો શોખ તમારા જીવનને હર્યુંભર્યું બનાવી દેશે. તમે ફાળવેલ થોડોક સમય બાકી સમય ને સુંદર રીતે પસાર કરવામાં મદદ કરશે. શોખ ને કેરિયર ન બનાવવું હોય તો પણ શોખ માટે સમય આપવો જ જોઈએ. કેરિયર થી તો તમને નામના કે રૂપિયા મળશે પરંતુ શોખ એવી વસ્તુ છે જે તમને આંતરિક શાંતિ આપે છે જે અમૂલ્ય છે.
પરંતુ આપણી આદત છે કે આપણે લોકો પાસે સમય નથી નું ગીત ના રાગડા તાણીયે છીએ પણ ખરેખર સંગીત નો શોખ માટે કોઈ પગલાં લેતાં નથી. આપણે સોશ્યલ મીડિયામાં રહેલ ખોટી વાતો વાંચીને સમય ને બગાડીએ છીએ પરંતુ ખરેખર વાંચવા નો શોખ હોય તો તે વાંચવા નો સમય નથી. આવું તો કેટકેટલું છે. સમય કાઢીને કરવાની જરૂર જ નથી કરશો એટલે સમય આપો આપ નીકળી આવશે.(#MMO ) લખવાનો શોખ હોય તો લખવાનું શરૂ કરો, ગાવાનો શોખ હોય તો ગણગણવાનું શરૂ કરો. વાંચવાનો શોખ હોય તો ચોપડીઓ ખરીદવાનું શરૂ કરો. ચિત્ર દોરવા પીંછી તો ઉપાડો, ડાંસ કરવા પગ તો ઉપાડો, શોખ તો કેટકેટલાય છે ક્યાંક આત્મસાત કરી ને શોધો અને જિંદગી ને જીવવા જેવી બનાવો
