Poem quotes are very popular on BitesApp with millions of authors writing small inspirational quotes in Malayalam daily and inspiring the readers, you can start writing today and fulfill your life of becoming the quotes writer or poem writer.
കവിത: ഓർമ്മ
രചന: ഫസ്ല ജൗഹർ
***************
കൈതോലക്കൈവരിയിൽ
കൈത്തോടായി ഞാനൊഴുകി . . .
പൂങ്കാറ്റിനോട് കുശലം പറഞ്ഞൊഴുകി-
യന്നെൻ ബാല്യം, നീ തിമിർത്താടിയില്ലേ!
പാടവും പറമ്പും, നീ കളിച്ചതിന്നോർമ്മ!
കോൺക്രീറ്റ് മതിലുയർത്തി നിൻ
പൊങ്ങച്ചമറുത്തൂ, ഞാൻ കൊണ്ട തണൽ;
കളഞ്ഞത് നീയെന്റെ ചന്തം!
ഹരിതകർമ്മസേന ഇരുകൈ നീട്ടി വന്നിട്ടും
പ്ലാസ്റ്റിക്കിനാലും പാമ്പേഴ്സിനാലു-
മെന്നെയെന്തിനെറിയുന്നു നീ?
കുഞ്ഞുപൈതങ്ങളും ഓക്കാനിച്ചെന്നെ
നോക്കുന്നേരം, പിടയുന്നെൻ നെഞ്ചകം
കണ്ട് മനംനൊന്ത് മാനം കരഞ്ഞു;
കാലം തെറ്റി പെയ്യുന്ന മഴയെന്ന് നീ!
ഉള്ളുരുക്കി മണ്ണ് കരഞ്ഞു;
ഉരുൾ പൊട്ടലെന്ന് നീ!
പ്ലാസ്റ്റിക്കുകൊണ്ട് മണ്ണും വെള്ളവും
തകർത്ത മനുഷ്യാ, ലജ്ജയുണ്ടേലൽപ്പം ചിന്ത?
മാനം കരഞ്ഞത് തോരാതെ വന്നാൽ,
മണ്ണിന്റെ വിങ്ങിപ്പൊട്ടലടങ്ങാതെ വന്നാൽ,
നീയും നീ കെട്ടിപ്പടുത്ത കോൺക്രീറ്റും വെറും പൂഴി!
ഓർക്കുക നീയിത്ര മാത്രം!!!
