જગતિયું તો સૌ કરે, શબ્દનું જમણ કરીએ તો નહી ચાલે !!
જીવતા "શબદીયા" જેવું કંઈ કરી લઈએ તો નહીં ચાલે !!
ભૂલો ઘણી કરી છે, કર્મોની પણ અનેક ગડી છે,
પડળ બધા ખોલી પુનઃસુધારણા કરીએ તો નહીં ચાલે !!
હશે અનેક ફરિયાદો કોઈને, પોતાના ગયા હશે રોઈ રોઈને,
આપણે પણ ફરિયાદો થોડી ડામી દઈએ તો નહીં ચાલે !!
યાદ બધા દુઃખો જ રહે છે, સ્મરણ ભૂલોના જ કહે છે,
સુખની પળો આપનારની ભૂલ બક્ષી દઈએ તો નહીં ચાલે!!
સગાની યાદી, વ્હાલામાં ઉમેરી દઈએ તો નહીં ચાલે !!
પારકા થયેલાને બેસણા પહેલા સારા કહીએ તો નહીં ચાલે !!
© હિના દાસા
