મન રાહ જોઈ બેઠું છે
મન અને મૃગજળ વચ્ચે નો ભેદ નથી સમજાતો
મૃગલા બધા જ મારીચ થઈ બેઠા છે.
જે સરોવરમાં હંસ મોતી શોધે છે તેમાં
બગલા મીન માટે મીટ માંડીને બેઠા છે.
ખિસ્સામાંથી તકો સરકી ન જાય તે માટે
આકાંક્ષાઓ સોય દોરો સાથે લઈને બેઠી છે.
કપાયેલી પાંખે વાટ શ્રીરામની જોવે
ઈચ્છાઓ બધી જટાયુ થઈને બેઠી છે.
પડઘમનો ભણકારો ચૌદિશામાં સંભળાય
એકલતા મનમાં વિસામો લઈ બેઠી છે.
યાદોના બીજ મૂળમાં રોપાણા હશે.
ફૂલોની વેલી થોરને વિંટળાયેલી બેઠી છે.
ઉડી જવાનું છે ક્યારેક પારેવું તન છોડી.
આયખું જીજીવિષા ના ધણ લઈને બેઠું છે.
ઉર્વશી એચ ત્રિવેદી
