અહીંથી સ્હેજ આગળ ચાલશો તો બાગ દેખાશે,
ને ત્યાંથી સ્હેજ આગળ શહેરિયતનો નાગ દેખાશે.
હજારો ઝાડ કાપી વૈભવી ફ્લેટો બનાવ્યાં છે,
બખોલોમાં વસેલા પંખીઓનો ત્યાગ દેખાશે.
તમારી નબળી ક્ષણનો લાગ જોઈ ચાંચ મારે છે,
અહીં સૌ માણસોમાં અેક કાળો કાગ દેખાશે.
ધણા વીઆઇપીઓ વૃક્ષ પણ મોંઘાં જ વાવે છે,
તેઓનાં ફાર્મ હાઉસમાં સીસમ ને સાગ દેખાશે.
બચેલી મિલ્કતોનો એક છે માલિક, બીજો બોજો,
અહીં સૌ દીકરાને બાપમાં બે ભાગ દેખાશે.
વધારે તેલ પડવાથી ઘણાં ભડકે બળેલાં ઘર,
ને ઓછા તેલથી ઝળહળ ઘણા ચિરાગ દેખાશે.
હું વધતી ગરમીને 'સાગર' ચિતા માનું છું ધરતીની,
હવે થોડા વખતમાં એ. સીમાં પણ આગ દેખાશે.
રાકેશ સગર, સાગર, વડોદરા
