અભ વરસેતો !
અભ વરસેતો ,ઝરમર ઝરમર ,
મીં જી વાછટ , ફરફર ફરફર.
મીં જા મામા રતા , મતારા,
ડિસજેં ન વડર મેં , મૂંકે તારા.
પન કુછેંતા, મરમર મરમર ,
મીં જી વાછટ , ફરફર ફરફર.
'વોંઘડી ' સટ કઢે ને ભજેતી ,
'પાલરધૂને ' મેં વિનીને છણેતી.
હેલ્લારો નચેતો ,સરવર સરવર ,
મીં જી વાછટ , ફરફર ફરફર.
સીમ ડુલેટી ,વિજ ખિવેતી ધોરી,
બંધી ગિડી આય, રેશમજી ડોરી.
'કાન્ત' મિલે તો,મનભર મનભર,
મીં જી વાછટ , ફરફર ફરફર.
***
-કૃષ્ણકાંત ભાટિયા 'કાન્ત'
(*વોંધડી -પુંઅરેશ્વર પાસે આવેલી
નદીનું નામ છે. *'પાલરધૂનો- આ
નદીમાં આવેલો ધોધ છે.)
