#ભીનું
એક ધારા સતત વરસાદથી ભલેને બધા કંટાળે પણ કહાની નહીં. કહાની હંમેશા માનતી કે ઉનાળામાં ક્યારેય ગરમી થાક ખાય છે કે ચોમાસામાં વરસાદ થાક ખાય? ટીટોડીના ઇંડાની ચિંતા ટીટોડી કરતાંય કહાનીને વધારે રહેતી કરતા કારણ કે એના પરથી જ આ વર્ષે વરસાદ કેટલો પડશે તેનું અનુમાન લગાવી શકાય. વરસાદમાં કહાની પોતાના બંને બાળકોને લઈને બહાર ફરવા નીકળી પડે. ભરેલા પાણીમાં છબછબીયાં કરવાનો આનંદ બાળકોની સાથે એ પણ માને. બીજા શહેરમાં વરસાદ વધારે પડે ને પોતાના શહેરમાં વરસાદ ઓછો પડેને તો પણ એને ન ગમે. એને તો બધું વધારે જ જોઈએ. હવે એવો વરસાદ ક્યાં અને એવું પલળવાનું કયાં ? આજે પણ વરસાદની એ જ ભીની યાદો વિદેશમાં વસતી કહાનીના આંખોના ખૂણા ભીનાં કરી દે છે.