सहन केलं होतं.....!
त्या दुराव्यात
तुझं न दिसणं
कधी न हसणं
मी सहन केलं होतं...
तुझी आठवण,
तुझ्या विचारांमुळे
रात्रीचं जागरण
मी सहन केलं होतं...
वर्षे गेली असतील
त्या निराश दिवसांत
हसऱ्या चेहऱ्यामागचं दुःख
मी सहन केलं होतं...
तुच माझा सखा
म्हणण्याच्या धाडसामुळे
घरच्यांचं ते रागात बघणं
मी सहन केलं होतं...
आपलं प्रेम फुलावं
त्या फुलण्यासाठी
स्वतः मन मारून जळणं
मी सहन केलं होतं...
जळल्यावर राख बनून
त्या राखेच्या निर्मितीवर
तुझं काळीज हेलावणारं बोलणं
मी सहन केलं होतं...
त्या निर्मितीला
परत जाळण्यासाठीचं
तुझं क्रूर वागणं
मी सहन केलं होतं...
त्या तुझ्या क्रूर वागणुकीवर
अंतःकरण तुटण्याचा आवाज न ऐकताच
तुझ्याकडून मातृत्व हक्क हिरावून घेणं
मी सहन केलं होतं...
इतकं सहन करून
परत शरीराच्या चिंध्या
मन मारून करू देणं
मी सहन केलं होतं....
📌 खुशी ढोके
