“દ્વાર ખખડે અને કોઈ ટપાલી હોઈ શકે,
ન કોઈ હોય; ગલી સાવ ખાલી હોઈ શકે.
સમયના હાથને કઈ રીતે ઠેલશો પાછો ?
એ માગે ચીજ તે તમને’ય વ્હાલી હોઈ શકે.
કોઈ લઈ આવ્યું મને આ ધધખતા રણ વચ્ચે,
બીજું તો કોણ; આ શ્રદ્ધા જ સાલી હોઈ શકે.
જો સ્થાનભેદ ના ગણીએ તો એક સંભવ છેઃ
તમાચા જેવો તમાચો’ય તાલી હોઈ શકે.
અમે ન ચાંગળું ચપટીક માગી પીનારા,
હોય તો હાથમાં છલકાતી પ્યાલી હોઈ શકે.
રમેશ, હોય છે સાપેક્ષ સર્વ ઘટનાઓ,
તમારી પીડા બીજાની ખુશાલી હોઈ શકે !”
😊રમેશ પારેખ
🙏🏻