રાખી છે
અંધવિશ્વાસમાં વિશ્વાસ રાખ્યો છે
નરી આંખે આંખોને સૂરદાસ રાખી છે.
ક્રોસ પર ટીંગાઈ ગઈ છે ઇચ્છાઓ આકાંક્ષાઓ
ફક્ત ખીલી ખોડવાની બાકી રાખી છે.
પ્રેમ હુંફ અને લાગણીઓ ના સરવાળા ખોટા પડે છે
લાગે છે દાખલો ગણવાની રીત જ ખોટી રાખી છે.
નસીબનું પાંદડું ઘર તરફ આગળ વધ્યું ત્યારે
કમાડ વાસી ને બારી ઉઘાડી રાખી છે.
જીવનના માર્ગોમાં ફાંટા જ દેખાય છે
લાગે છે શરૂઆતથી દિશા જ ખોટી રાખી છે.
શતરંજની રમતમાં પાસા અમારે પાડવાના.
મોહરા ની ચાલ ઇશ્વર તેં તારા હાથમાં રાખી છે.
શ્રદ્ધાના દીપકને બુજાવવા ના દેતો હે ઈશ્વર
હલેસા વગરની હોડી તારા નામે તરતી રાખી છે.
ઉર્વશી એચ ત્રિવેદી
