તમે આવી,ગયા છો ત્યારથી અવઢવ યથાવત છે.
તમારો દેહ છે કે કોઈ શિલ્પીની કરામત છે !?!?
તમે ચૂમી ગયા છો હોઠને હું ત્યારથી માનું,
તમારામાં 'ને અમૃતમાં કશોએ ક્યાં તફાવત છે !!!
ફિકર ના કર,નવા હું તેજ સાથે કાલ મળવાનો,
હા,સુરજ જેમ ખર્ચાઈ મને સુવાની આદત છે !!
ગમે તેવું લખીને હું કલમ ઝાંખી થવા નહીં દઉં,
ખુલાસો આપવો પડશે,એ પૂર્વજની અમાનત છે.
તમારી નજરે જુઓ એ તમારો વાંક છે,બાકી
ગઝલ મારા હૃદયમાં મોજથી છે 'ને સલામત છે.
મુબારક ઘોડીવાલા 'દર્દ' ટંકારવી.
