ગામ નાનું અને ભાગલા ચાર પાંચ
રોજ ભડકે અહીં આખલા ચાર પાંચ
ડોઢ ડાહ્યાની છે ફોજ મોટી અને
એની પાછળ ફરે ચાંપલા ચાર પાંચ
ભીખ માંગ્યા કરે ધન કુબેરો સતત
હોય છે ગામમાં બાપલા ચાર પાંચ
આધુનિક ઘર થયાં ને હૃદય સાંકડા
કોણ રાખે હવે ખાટલા ચાર પાંચ
ધારણા સાચી પડતી નથી દર વખત
સાવ ખોટા પડ્યાં દાખલા ચાર પાંચ
શ્વાનને માણસોમાં ફરક શું કહો
શોધી નાંખો હવે થાંભલા ચાર પાંચ
એમ 'સાગર' મળ્યાં કામના માણસો
ઓઢણીમાં બચે આભલા ચાર પાંચ
સગર રાકેશ ,સાગર, વડોદરા
