તરહી ગઝલ##
પડી વિજળી કડકતી ને બહુ વરસાદ આવે છે
તમારા પ્રેમ જેવો હૂબહૂ વરસાદ આવે છે
વિરહણી આગ શીતળ જળ બની વરસી રહી આજે
વિના તારા કહે ક્યાંથી સહું વરસાદ આવે છે
હવાનો રુખ ફરી ના જાય, છોડો દિલ્લગી આવી
છે ઋત ભીની ને કોરી હું રહું વરસાદ આવે છે
લહૂની લાલિમા છે આંખમાં ને રક્ત છે આંસુ
વરસતા મેઘ સાથે હું વહું વરસાદ આવે છે
છે મોસમ પ્રેમની જાણે કે બારેમાસ ની વર્ષા
ભલે વરસાદ ના હો હું કહું વરસાદ આવે છે
સમય, દુનિયા, બધાથી થઈ પરે ચલ માણીએ ઋતને
મને તું જો, તને બસ જોઉં હું, વરસાદ આવે છે
"ચાહત"