હું તરબતર પલળુ છતાં શેની તરસ વરસાદમાં?
તારી તલબ છે તું જ આવીને વરસ વરસાદમાં
મદથી છલોછલ આંખનાં જો જામ છલકાશે નહીં
ચાતક હૃદય ની તો પડે ખોટી ધગસ વરસાદમાં
જો એક ધ્રુવ ખેંચે બીજાને, દૂર થઈ શકશે નહીં
થાશો વિવશ દેવા પછી અમને દરસ વરસાદમાં
કોરા હ્દય પર પ્રેમની ભીની ગઝલ કંડારશુ
તો યાદ રહેશે આ ક્ષણો વરસોવરસ વરસાદમાં
મોસમને તો જાણે ચડ્યો છે કૈફ આ રસપાન નો
પાણી ની સાથે આજ ઘોળી છે ચરસ વરસાદમાં
છે પક્ષમાં કુદરત પછી શું ડર જગતનો રાખવો?
પરદો છે જલધારાનો, થઈ જા એકરસ વરસાદમાં
ચાહત
