#બેદરકાર
" તે દિવસે ઓફિસથી આવીને ભૂલથી તાપસીના ટુવાલથી મેં હાથ, પગ, મોઢું શું લૂછી લીધા? એમાં તાપસીએ મને બેદરકાર કહી ને મારી સાથે ઝઘડો કર્યો. બેદરકાર કહ્યો તો કહ્યો પણ બીજા દિવસે મારા નવા ને નવા ટુવાલથી આખા ઘરમાં પોતું કર્યુ. આમતો આખો દિવસ પીઠમાં દુખાવાનું બહાનું કાઢીને તાપસી બધું જ કામ કામવાળા પાસે કરાવે. પરંતુ એ દિવસે એનો પીઠનો દુખાવો ગાયબ થઈ ગયો. હવે તમે જ કહો કે આ મોંઘવારી માં આવું બધુ કરે એ પોષાય ? એ ટુવાલનો ભાવ કરી કરીને પણ છેલ્લે બસ્સો રુપિયા આપેલા. " પોતાના ઘરે આવેલા તાપસીના મમ્મીને તાપસીનો પતિ મોહિત તાપસીની ફરિયાદ કરતો હતો અને તાપસીની મમ્મીની નજર રસોડા તરફ હતી. તાપસીને ચા બનાવતા વાર જો થઈ હતી.