मी न माझी राहीले....
श्रावनसरी झरूनी वाळवंटी,
लालिमा प्रेमाची चढवुनी गेला।
निलाजरी होऊनी बहरले मी,
केवडा मनाचा दरवळत गेला।
अबोल कळीला स्पर्शूनी दवाने,
अमृत धारा बरसवूनी गेला।
निरगाठ बांधुनी माझ्या संगती,
मोतीया रंगात रंगवूनी गेला।
स्वप्नांची रजनी मनी सजवुनी,
चंद्रमा तो! चांदणे लेवूनी गेला।
अचेतन होऊनी थांबले होते,
स्पंदने हृदयास देऊनी गेला।
ढळत होती ही सांज जीवनाची,
हृदयी वसंत फुलवुनी गेला ।
होऊ कशी मुक्त मी बंधनातूनी?
कैद प्रीतीची खास देऊनी गेला।
तुला शोधता ही 'अनु' हरवली,
माझ्यातुनी तू 'मज' घेऊनी गेला।